கண்ணனின் கிறுக்கிப்போட்ட காகிதங்கள்

உடுக்கடித்து உருக்கொண்டு

உணர்ச்சியிலே கலையாடி

உணர்வுதனில் விளையாடி

உயிர் பறிக்கும் ஓர் தருணம்

கண்ணீரில் விளக்கேற்றி

கரம்கூப்பித் தொழுதாலும்

கருவறுக்கும் காரியங்கள்

கச்சிதமாய் நடப்பதென்ன

சிறுபிள்ளைத் தனம்கொண்டு

சிறிதேனும் வலி அறியா

சிறகொடிக்கும் வேள்விதனில்

சிறு துளியாப் பெருவெள்ளம்

சாதனைகள் சோதனையாய்

சான்றிதழ்கள் வரைந்தாலும்

சாரீரம் இல்லாது இசையோடு

சங்கீதம் சுவைப்பதுண்டோ

எல்லைகள் தாண்டுகையில்

எதிர்ப்புக்கள் தலைதூக்கும்

எண்ணங்கள் எமை ஆண்டால்

எல்லாமே வினையாகும்

பிடிவாதம் புனர்வாழ்வின்

பிடியாணை பிறப்பிக்கும்

பிடித்தவைகள் எல்லாமே

பிடிக்காமல் பரிதவிக்கும்

நரிகள் கூட நமைப் பார்த்து

நாசுக்காய் நகைத்துச்செல்லும்

நன்றியின் வாசலில் நாய்களின்

நாதங்களே கீதங்களாகும்

இனித்தவைகள் கசந்திட்டால்

இனியென்ன செய்யத்தோணும்

இதற்கும் மேல் ஏதுமென்றால்

இறந்துதான் காட்டவேண்டும் !